يابني... للشاعر أبو عزام محمد العيدروس

يـا بُـني

أحمد الله خـالـقي واثـني بحمده واشكـره

عـالـم احـوالي ونـيَّـاتي مـلاذي والـمجـير

واسألـه عـفـوه وحسن الخـاتـمه والمغفره

والسلامه لاقـبل اليوم العـبوس القمطرير

بـعـدها ياالـهـاجس اتـعـنّى بنظمي حـبِّـره

وانتـقي من طيبات المنجم الراقي الغـزير

صيـغ لي حِـليه تـكـن للجيل بعدي تذكـره

عسجديه تسلب الأشغاف بالحسن النضير

مَـن تـأمـلـهـا يـلاقي مـحـتـواهــا تـبـصـِره

فالـموفِّـق مَن يخلِّـد بعـده الـذِّكـرالـشـهـير

الحـق الـفُـرصه فـقد قـفّـا من العمر اكـثره

جود من جودك ولاتبخل فخـير الله كـثير

يـابُـنَي امسـك بـواحـد ينـظرك ماتـنـظـره

الـرقـيب اللي بـمـاتـبدي ومـاتخفي بصـير

لايشـوفـك حـيث مـاينـهـاك عـنّـه واحـذره

إحـفـظه يحـفـظك نـفِّـذ ماأمر تحيا أمـير

واغـتنم فترة شبابك لُب عمرك واخـطـره

مابواكيره حسافه كان في المختم حسير

عِزنفسك شِب عن طوق الغِـوايه واكـسره

صحـح الـنـيَّـات واتوكل وشاور واستشير

خـذبشوراحدب مجرِّب شِيب راسه وقَّـره

ناضج الـتـفكـير فهـمـه مثلمـا عمره كـبـير

شل بالـمجـان عِـبـره من تجـارب قـسـوره

اشـتـراهـا من صروف الـدهـر بـالمرالمريـر

واحذر الواطي تجي له أوتـشرف مسمـره

سيرة الإنسان من سيرة خـليلـه والسمـير

قـدِّر الـرجَّـال وافـهم جـوهـره مِن مجـبره

مِن خـلال القول ينقـاس المكـمل والغـرير

واتـرك الـلَّاوي لـراسـه لا يـغــرك مـنـظــره

ساعـة الضيقـات يتخـلّـف كما بول البعـير

والـذي مايوم خـدِّه عـن جـلـيسـه صـعَّـره

توجده في الليلـه الـظـلمـأ كـماالبدر المنير

الغضب لوخان حِلم الشهم لحظه واجـبَره

يقـترف زلـة بحقـك سامحـه مـهمـا يصـير

عـاقِـب النشمي بسوط العـفو عندالمـقدره

فالتغاضي يشعِل التأنيب في حي الضمير

واعتني بالضيف لوجـاك اكـرمه لا تضجره

كِـرمةالضيفان تعكس شيمةالشهـم القدير

وانـتـبـه لاجـاك سائل ضاق حـالـه تـنـهـره

من عَطاك اليوم قـادريجعـلك بكـره فـقـير

واعلم ان الـرزق ماهـو بالذكاءوالـمشطـره

لويجي الّا للذكي ماعاشت اسراب الحمير

شُـد عـزمك ون تلوح بارق الـرزق اظـفـره

والـبُكـرفيها المصالح خيرمحصول البكـير

لـيـل مـامِـنّـه عـوائـد تـنـفـعـك لا تـسـهـره

فالسهـر مايجلـب الِّا كل شر(ن) مستطـير

الـتـزم بـالـصـبر ذلِّـل كـل عــايـق واعـبـره

كُـد مـادام النـبَـض خفَّـاق واصلت المسير

وارغَـدالعيش الـهني ماكان طيِّب مصدره

الحـلال لـو دق خيـطـه بينه الخير الوفير

فارتضي المقسوم واكـبح نفسك المتهوره

النبي المختار جـرَّح كاهله سعف الحصير

واحـتوي حـواء بعـطفـك لاتفـرط بالـمـره

فالكـريم الشهم مكـرِمهـاوحاقـرها حـقـير

الـحِسان السايبه عُرضه فصون الجوهـره

فـالـذيابـه كُثر والمسلم على عِـرضه يغير

عِـزهـا واجـبـر بخـاطرهـا وحـاذر تكـسره

هي بساط الـعمر لاتـعـتادهـا بسطة سرير

إنـكـسار الـعـظم يلـقى ألف جـابـر يجـبره

والـخـواطركالزجـاجه مالمكـسرهـا جـبِـير

واتخـذ من صدرك الـتـابـوت للسر اقـبِـره

لاتصدق ذي يقل لك هات سرك وسط بير

لـن يصون الـسر مَـن طبـعه يحب الثرثره

فـالّـذي ماهو قفص مُحكـم لأسراره تطير

واتّسِم بالصمت واتحرى من القول اطهره

لا تجي للكذب قد قال المثل حبلـه قصير

.....................

✍أبوعزام محمد العيدروس

24/11/2020