كوفيد في زمن المجاعه.. للشاعر محمد همدان

كوفيد في زمن المجاعه

يقول همدان رسل لي صديق منشور
              مكتوب فيه هااام عاجل والمداد احمر

الساعه احدعش راسلني وانا مسرور
                وقال هذا الكلام موثوق من مصدر

فقلت بقرى بدقه فلعلام من نووور
                  او يمكن ان السعاده فجرها اسفر

خليك في البيت هذا مطلع المنشووور
            مادام كوفيد شمر ليديه شمر

وقال حتى ولو في البيت تبقى أشهوووور
          لا تخرج الباب حاسب يا اخي واحذر

ابقى في البيت وآكل أيش يا دكتور
              اذا تعشيت والله ما معي ماافطر

بعض الاوادم امانه ياجماعه عووور
              ماشاف للفقر ذي في الريف والبندر

وشاف فيروس ذي ماشافه الجمهور
                ماعد معه عين هذا قد معه مجهر

بالله عليك قول من بايطعم العسكور
                  بلا رواتب وقد نصف البلاد عسكر

وذي معه وسط بيته اربعين سنفور
                 ذي لاوضيفه معه في وعدنا الاغبر

يامن تظن الجميع في شعبنا مستور
             والله ما عاد مستورات غير الذر

لانها وحدها ذي قد معاها قووور
                تجمع لاكل السنه في شهر ديسمبر

اما عن الشعب هذا مثلما العصفور
                اذا حبسته فقط يومين بايغمر

هذه حقائق جليه مش شهايد زوووور
                عد في المحرم حرام والفقر فيه افقر
               
يامن تقولو لنا ان نحتبس بالدور
               تشتو نموت جوع ام تشتو نكل للخ...

بمسك بحبل القوي ذي يجبر المكسور
             مادام مافي مفر منه اذا قدر

وانت ياصاحبي من ذا الهدار محجور
             مابعد ما اقول لك محجور فنت اخبر

متنا من الجوع والصاروخ والفسفور
             ما غير كوفيد قايس طعنه الخنجر

محمد همدان